తుపాను కెదురు గా

05-Nov-2018

https://m.dailyhunt.in/news/india/telugu/prajasakti-epaper-prajasak/tupaanukeduruga-newsid-100837746

తుపాను కెదురు గా   -గవిడి శ్రీనివాస్ 9966550601, 7019278368

కొద్దిపాటి సమయాల్ని ఒడ్డున ఆరేసి 

పెను తుపాను జీవితాల్ని 

ఆహ్వానించలేక  ఆస్వాదించలేక 

లోలోపల  ఇష్టాన్ని వొoపలేక  

నాలో ఇక ఇమడలేక 

పొడి పొడి గా రాలుతూ 

గాయాల్ని కొద్ది కొద్ది గా  దాస్తూ 

ఈ దేహం దిగులు సంద్రం లో మునిగిపోతుంది.

తూరుపు కెదురు గా నడుస్తాను 

ఒక ఉదయం సమీరం లా  తాకుతుందనీ. 

వాకిట తలుపులు  తెరుస్తాను

చిరు నవ్వే  గాలి తెరలు గా కవ్విస్తుందనీ.

రోజులు గడిసే కొద్దీ 

రూపాలు రూపాంతరం చెందుతున్నాయి .

ఏకాగ్రత కోల్పోతున్న క్షణాల్లో 

నక్షత్రం లా  ప్రత్యక్షమౌతావ్ .

నా వొంటి నిండా 

నువ్వు  అనేకానేక  నక్షత్రాలై  మెరుస్తుంటే 

నీ తలపులకే  బానిసనౌతున్నా .

ఎక్కడికని పారిపోను 

నాలో  బంధించి బడ్డ  ఆణువణువూ 

నీ రూపం తో  అలంకరించ బడ్డాక!

కాసేపు  నీ మాటల్లో వొలికి 

మరుక్షణం  నీ చేతుల్లో  వొదిగి 

తుపాను  కెదురు గా  వెళ్లే 

సాహసాన్ని  రంగరించే  నువ్వున్నంత సేపూ

నాలో రాత్రి పగలు 

స్వర్గపు అంచున తడి చుంబన 

మృదు భావన తాకుతూనే ఉంటుంది !

ఈ మౌనం వెనుక

http://www.prajasakti.com/Article/Features/2084057

29-oct-2018

ఈ మౌనం వెనుక - గవిడి శ్రీనివాస్ 

ఈ  కను  రెప్పల ముంగిట 

మౌనం భాషిస్తోన్న వేళ

సంభాషణ  మౌనం వహించింది .

అనురాగపు తీగల పందిరి లో 

గాలి వీయగా నేనో మౌన పరవశాన్ని 

వాన కురియ గా నేనో వికశించే  పుష్పన్ని 

నా ఎద  లోతుల్లో  ఒలికిన  రాగాలెన్నో 

నా హృది పొదల్లో  గుభాలించే సువాసన లెన్నో 

అలా తూనీగలా జాలువారుతూ 

పరిమళ  ప్రపంచాన్ని ఆస్వాదిస్తూ 

నాలో ఒక నేను ఆనంద ప్రపంచం లో 

మునిగి పోతాను .

చుట్టూ సౌంద్యమూ ఆహార్యమూ 

అనురాగమూ పెనవేసుకుని 

కొన్ని రసానుభూతులు   మిగులుతాయ్.

ప్రేమను పొందేక్షణాలెపుడూ

మనసు పొరల్లోంచి జారిపోవు .

కాల ప్రవాహం పారుతుంది 

ఋతువులూ దొర్లుతుంటాయి 

నాలో కొన్ని జ్ఞాపకాలు అలా నిలుస్తాయ్.

ఈ మౌనం వెనకాల 

ప్రోది చేసుకున్న  సంతోష సమయాల్ని 

ఈ కన్నుల్లో దివ్వెల్లా  వెలిగే గడియల్ని 

చెరిగిపోకుండా  ఆలా ఒడిసి పట్టుకోవడమే 

నా ఆంతరంగిక  ఆనంద రహస్యం !