ఇల్లు కొన్ని దృశ్యాలు

palapitta monthly Aug2017

ఇల్లు కొన్ని దృశ్యాలు - గవిడి శ్రీనివాస్  07338053650, 9966550601

నా చేతి వేళ్ళు  పట్టుకున్న

ఉదయం లా నవ్వుతూ 

కాస్తంత ముందుకి 

ఇల్లు పిల్లాడి  అల్లరితో  ఊగుతుంది .

తెరచిన కిటికీ అరల్లోంచి 

చేతులు చాచుకు ఎగిరే గాలికి

 గోడకి వేళ్ళాడే  క్యాలెండర్లు 

ఎగిరి ఎగిరి నవ్వుకుంటున్నాయి.

మూసిన హృదయాల్ని తెరిచే తలుపులు 

కొద్ది కొద్ది గా వీధి దృశ్యాల్ని 

కూరగాయల బండి  గానో  నడిచి పోయే  బాధ్యతల గానో 

ఒంపుతున్నాయి.

సందర్శించిన ప్రదేశాలు 

మాట పంచుకున్న అనుభవాలు 

నాల్గు గోడల మధ్య 

జ్ఞాపకాల ఆకుల్లా రాలుతున్నాయి.

ఒక మునిలా ధ్యానిస్తుంటే 

ఆత్మ దర్శనం లో 

జ్ఞాన సంద్రాలు ముంచుతున్నాయి .

ఆరబోసిన ఆకాశం కింద 

పిల్లాడు బొంగరం లా  తిరుగుతుంటే 

చుక్కల ఆకాశం చొక్కాలో  మెరుస్తోంది .

ఆరుబయట చినుకులు 

బుగ్గల్ని గిల్లుతూ ముత్యాల్ని అద్దుతూ 

తూనీగల్ని పైపై ఊపుతూ 

మనోరథాన్ని  మహిమాన్వితం  చేస్తున్నాయి .

మౌన ప్రపంచాన్ని ముక్కలు చేసి 

మాటల  లోగిళ్ళు 

ముసిముసి నవ్వులై కుదుపుతున్నాయి .

ఉదయానికి సంధ్య కి మధ్య 

చెరగని మధురానుభూతి లా .