అలా చూడు ప్రపంచం

Posted On: Saturday,July 30,2016

అలా చూడు ప్రపంచం
గడియారం ముల్లు
గుండెల్లో గంటలా మోగుతుంటే
క్షణాల్ని నెత్తిన ఎత్తుకుని
నిర్ణయించబడ్డ సమయానికి
అడుగులు సమాయత్తమవుతుంటాయి

ఇక్కడ గమ్యాలు చేరడమంటే
హారన్‌ ఊదుతున్న ఆటోల వెంటో
ఘోషించే కెరటాల్లాంటి బస్సుల వెంటో
హడావుడిగా ముస్తాబైన మెట్రో రైళ్ల వెంటో
మనల్ని మనం ఆరేసుకోవడమే.

ఇక్కడ జీవితమంటే
ఆకాశాన్ని వంచి మెరుపుల్ని మోయడమే
వొడిసిపట్టిన సమయాల్ని నిలదీస్తే
దానిలో మనం మనలా జీవించిన
క్షణాల్ని లెక్కించ గలిగామా!
చుట్టూ చూస్తుంటే
పల్లె చాపలా చుట్టుకు పోతున్నట్లు
పట్టణం ఉక్కపోతలో ఉడికిపోతున్నట్లు
చెమర్చిన కళ్ళు చెబుతున్నాయి
వొక సందర్భం
వొక పూర్తి కాని స్వప్నం
మనల్ని కొత్తదారుల వెంట తరుముతుంటాయి

ఇక్కడ ప్రేమను వొంపే మనసుంది
మనసుని నీ ముందు నిలబెట్టే ఆశా వుంది
నీతో గడపడానికే సమయం గొడవ పడుతుంది

కాలం కన్నీరు కారుస్తుంది
మనిషి పరుగుని చూసి
ఒకింత దిగులుగా కాస్తంత జాలిగా

వృద్ధి చెందడమంటే
మనసుకి కారాగార శిక్ష వేయడం కాదు.
కొన్ని విలువలు కొన్ని మమతలు
కలబోసుకోవడమే.
- గవిడి శ్రీనివాస్‌
9985010538

http://www.prajasakti.com/Article/Sneha/1822895

Jul01

పిచ్చుకల్లేని ఇల్లు

Posted on July 1, 2016 by జ్యోతి వలబోజు

రచన: గవిడి శ్రీనివాస్

ఇంటిలో వరికంకులు
దూలానికి రెక్కలు చాచుకు వేలాడినపుడు
చెంగు చెంగున
ఎగురుతూ తేలివచ్చిన పిచ్చుకలు
మనసు లోయల్లో ఊయలలూగేవి .

వరిచేను కోసిన దగ్గరనుంచీ
కుప్పలు నూర్చే వరకూ
కదులుతున్న నేస్తాలుగా ఉండేవి .

పిచ్చుకలల్లిన గూళ్ళు
ఇప్పటికీ మనసు పొరల్లో
జ్ఞాపకాల ఊటలు గా
సంచరిస్తూనే వున్నాయి .

పిచ్చుకల కిచకిచలు
ఇంటిలో మర్మోగుతుంటే
ఆప్యాయతలు బంధువల్లే నడిచొచ్చినట్టు
గుండె లోతుల్లోంచి అభిమానం
తీగలై లాగుతున్నట్లు
తెలియని పరవశం
పరిచయమయ్యేది .

ఎండుతున్న వొడియాల చుట్టూ
పిచ్చికలు
వాటి చుట్టూ పిల్లలు
ఓ పసందైన ఆటలా ఉండేది .

ఇప్పుడు పిచ్చుకల్లేని ఇంటిలో
ఆ శబ్ద పరిమళమేదీ .

కృత్రిమ ప్రపంచపు అంచుల్లో
విషపు ఎరువుల లోకం లో
కలుషిత వనాల్లో
ఎగరాల్సిన పిచ్చుకలు
సందడి చేయాల్సిన కిచకిచలు
అలా రాలిపోతున్నాయి .

గుండెను తడుముతూ
కాల శిల్పం మీద
కొన్ని కొన్ని జ్ఞాపకాలుగా
వాలిపోతున్నాయి .

Posted in అవీ, ఇవీ | Tagged కవిత | 1 Reply

http://magazine.maalika.org/category/everything/

ఒక జీవితం

Posted On: Saturday,July 9,2016

కొన్ని ఉరుములు
కొన్ని పిడుగులు
జీవితంలో ఉలిక్కి పడుతుంటారు!

సంతోష సాగరంలో ఈదుతున్నపుడు
తన్మయ క్షణాల్లో మునుగుతున్నపుడు
కోల్పోయిన బంధాలేవో
లోలోపల అలా తడుముతుంటారు!
మూలాల వెంట వదిలిపోయినవి
కళ్లెం పట్టుకు లాగుతుంటారు!

దూరమైన జీవితాల్లో
భౌతిక సమ్మేళనాలుండవ్‌
గాయపడ్డ మమతల దేహాలు తప్ప!

నాకిప్పటికిప్పుడు
నా వాళ్ళతో నా మట్టితో
కాసేపు మనసారా కురిసే
మాటలా జారిపోవాలనుంది

జీవితమంటే
నలుగురి ఆప్యాయతల కలయిక
మనసు ఊరటను
వ్యక్తపరిచే ఒక వేదిక
హ దయం రెక్కల రెపరెపల్లో
సందర్భాల్ని వెతుక్కుంటూ
కాలాన్ని మోసుకుపోతున్నాను

మనసారా నవ్వడానికి
ఆర్థిక కొలతలు అవసరం లేదు
అంతుచిక్కని లెక్కల్లోకి దిగితే
సమీపించే కొద్దీ సాధించేకొద్దీ
చేరాల్సినది వేరే ఉంటుంది

గమ్యాల చేరికలో ఒక జీవితం
సుగంధాల జల్లులు కురుస్తున్నట్లు
వేపచేదులు తినిపిస్తున్నట్లు
ఒక అనుభూతి అంతర్భాగమవుతోంది
ఆగని కాలం గుర్రపు స్వారీ చేస్తుంది
మనమే కన్నీళ్లను తీపిగా చేదుగా
అభివర్ణిస్తుంటాం
జీవితం అనేక అనుభూతుల, అనుభవాల విద్యాలయం!

- గవిడి శ్రీనివాస్‌
087227 84768