నాలో నా ఊరు

http://epaper.andhrabhoomi.net/articledetailpage.aspx?id=4309734

13-12-2015(andhrabhoomi.)

నాలో నా ఊరు

-గవిడి శ్రీనివాస్ 996655060112/12/2015

ఎన్ని కాలాలు
అలలు అలలుగా నడచి వచ్చినా
నాలో వట వృక్షంలా నిలిచిన నా ఊరు
విజ్ఞానాన్ని బుర్రలోకి వొంపుకుంటూ
ఎన్ని దూరాలు
జీవిత సందర్భాలుగా మారినా
కాస్తంత సమయం దొరికితే చాలు
నా పైరు నా పల్లె
రెప్పల మీద పిట్టల్లా వాలుతూనే ఉంటాయి
నా పల్లెలో
వలస పక్షుల్ని చూస్తున్నాను
తడారిన గుండెల్లో
పగిలిన బీడు భూముల్లో
మొలకెత్తని ఆశలు
వలస పోతున్నాయి
అయినా చెదిరిన స్వప్నాల్ని
మళ్లీ నిర్మిస్తున్నాను
పల్లె గుర్తొస్తే చాలు
దేహం ముక్కలు ముక్కలుగా
రాలిపోతుంది
పల్లె రుణం తీర్చుకోడానికి
మనసు ప్రణమిల్లుతోంది
పల్లెకు పోతాను
రైతుని విజ్ఞాన నిధిగా నిలిపేవరకూ
పల్లెకు పోతాను
మేట వేసిన జీవితంలో
ఒక ఆశగా మొలకెత్తుతాను.