Home » Features

తొలకరి జ్ఞాపకం!

Posted On 16 hours 26 mins ago

మబ్బుల రెక్కలు ఊగుతుంటే
తొలి తొలకరి జల్లు మనసును తడిపేది
పంట పొలాల గుండెల మీద
నా ఎడ్ల బండి కొత్త దారుల్ని తొలిచేది
గరిసెడు గత్తం బండిలో పరుగులు తీసేది
ఎద్దుల గంటల్లో ఆశలు మోతలు మోగేవి

వెన్నెల వొంపిన చందమామ సాక్షిగా
ప్రతి మడిలో రాత్రిళ్ళు ఎరువుల కుప్పలు విరిసేవి
పనిలోని ఆనందాన్ని
ఆ ఆనందంలోని ప్రక తిని
నా కూనిరాగాలు పరవశింపజేసేవి
తడి తగిలితే చాలు
నాగలి కర్రు నాగేటి చాళ్ళలో
మట్టి గుండెల్ని చీల్చుకుంటూ ఉరకలు తీసేది
ఎన్ని మైళ్ళు నాగలితో నడిచాను
ఎన్ని సార్లు విత్తనంతో మొలకెత్తాను

తెల్లవారు జాము చంద్రుడు పూస్తున్నప్పటి నుంచీ
సూరీడు వేడెక్కేవరకూ
నాగలితో ప్రయాణం
జీవన వేదమయ్యేది
బతుకు పాటయ్యేది
పాట పల్లవించిన బతుకులో
నాగలి కర్రు కళ్ళల్లో హరిత వనాల్ని నింపేది

ఇప్పుడు నా నాగలి జాడేది
ఇనుప దున్నల కింద
కనుమరుగై పోతున్న నా ఎడ్లబండి
ఆనవాళ్లైనా మిగుల్చుకోవాలని తల్లడిల్లుతున్నాను
- గవిడి శ్రీనివాస్‌
08722784768, 9966550601

http://www.prajasakti.com/Content/1779612